麥田捕手 第一章 廣東話版本
Thursday 9 February 2017
若果你真係想聽嘅話,第一樣你想知嘅可能係我係邊度出世,我個難頂童年又係點樣過,係生咗我之前我老竇老母嘅生活又係點,同埋嗰啲好似塊肉餘生記咁嘅嘢,不過如果你想知真話嘅話,其實我就唔多想講。喇首先,講呢啲野呢就會悶親我,第二,若然我講咗啲咩關於我老竇老母嘅私人嘢,佢地兩個一定會激到嘔血。佢地對住呢啲事好易就燥,特別係我老竇。佢地兩個都好好人--喇我唔係咁意思吖──不過佢地份人就敏感到爆。同埋呢,我而家唔係要出咩死人自傳呀。我淨係想同話你知,係我搞到好崩潰要嚟呢度放鬆返個人之前,即係舊年聖誕嗰段時間,有咩痴線嘢發生咗係我身上。就算係D.B,我阿哥,我同佢講嘅都淨係呢啲。佢而家係何李活。唔係話離呢笪爛鬼地方好遠嘅,佢每個禮拜尾都會嚟探我。我下個月可以離開呢度返屋企嗰時,佢都應該會嚟車我返屋企。佢啱啱買咗架積架。係嗰啲可以一個鐘行成二百里嘅英國車仔。差唔多洗咗佢成大喇喇四千蚊美金。不過佢大把錢啦家陣。佢以前就唔係喇。佢仲係屋企住嗰時,佢都係個好普通嘅作家。佢有本好正嘅短篇小說集,如果你未聽過嘅話,本書書名叫那條祕密金魚。入面最正嗰篇就係叫那條祕密金魚。係講一個細路仔唔肯比人睇佢條金魚,因為條金魚係佢自己比錢買嘅。真係正到無得頂。D.B.佢而家走咗去何李活,簡直係出賣咗佢自己。如果呢個世上有啲嘢係我憎嘅,就係嗰啲荷李活片。係我面前,你真係提都唔好提嗰啲戲呀。
我想由我離開Pency Prep嗰日開始講起。呢間學校係喺Agerstown Pennsylvania。你可能都聽過呢間嘢嗰名。你應該點都睇過下佢啲廣告。佢係成千份雜誌都有賣廣告,每次都係SHOW住個勁友騎住隻馬跳過個欄。搞到好似你嚟Pency Prep嘅話,你日日做嘅就淨係玩馬球咁。我甚至乎從從未係呢度附近見過一隻馬。係個男人騎住隻馬張相下面,永遠有呢句:「始於一八八八年,本校一直致力教養學子,塑造聰敏好青年。」我頂佢個肺!佢地係PENCY呢度做嘅爛鬼塑造唔見得多過其他學校。同埋我無係Pency呢度見過任何一個人係又好又醒目囉。或者有兩個嘅最多。而且佢地應該係嚟PENCY之前已經係咁。
是但啦,係嗰個星期六,Pency有場對Saxon Hall橄球比賽。呢場對Saxon Hall嘅比賽應該係好緊要架,對成個Pency嘅人嚟講。佢係全年最後一場比賽,如果Pency贏唔到,你好似係應該要去死咁款。我記得嗰時大約係下晝三點鐘,我係Thosen Hill嘅山頂,企咗係正美國獨立戰嗰時用嘅大炮隔離。你係呢度可以睇到成個比賽場地,見住兩隊人係度撞嚟撞去。你唔會好睇得清個看台,但就可以聽得好清楚佢地係度大叫,Pency嗰邊就勁大聲勁興奮,因為成間學校嘅人都係齊度除咗我一個,SAXON HALL嗰邊看台就又虧又細聲,因為佢地嚟作客好難可以帶埋好多人一齊嚟。
呢度嘅欖球比賽從來都無幾多個女仔觀眾。學校淨係畀高年班學生帶女仔嚟睇。左睇右睇,呢間都係爛鬼學校嚟。我想身處嘅地方,起碼間中都可以見到兩三個女仔,就算就算,佢哋喺度都不過係搲手臂,呻下鼻涕,甚至只係戇居居咁笑下,又或者是但點都好啦。Selma Thurmer,校長嗰女,有親波睇都會出現,雖則佢唔係嗰啲靚到嘩一聲嘅女仔。不過,佢都唔錯嘅。有次坐巴士去Agertown嗰陣,我坐咗喺佢隔離,之後叫做傾個下計咁啦。我都幾得佢。佢嗰鼻又大,啲手指又咬到一啱一忽,睇落去血紅紅咁,啲假眼睫毛長到掃把咁周圍掃,但係望落你會有啲可憐佢。我之所以中意佢,係佢唔會晒命佢老竇有幾咁勁。反而,佢分分鐘都知佢老竇係條扮晒嘢嘅粉腸。
我走到上嚟湯臣山咁高,而唔係喺下面睇波,係因為我啱啱先同劍擊隊喺紐約返嚟。我係劍擊隊嘅經理嚟。簡直不得了。我哋去紐約係要同MuBurney School打比賽。只不過,最後比賽唔成。我將啲劍呀、器材呀、戟澀卡勒呀,乜都留晒喺地鐵。嗱,唔係得我一個人有錯架。我keep住都要睇地圖,唔係就無人知要喺邊落車。本來預食夜晚飯嗰時先返到,結果,我哋兩點半就返咗嚟。返嚟嗰時,成隊人無人show我。成件事都幾好笑吖,其實。
我無去到睇波嘅另一個原因係,我去緊同我HISTORY老師Spencer講bye bye。佢感冒病咗,而且我發現聖誕之假開始前,我都唔會再見到佢住。佢寫咗嗰便條嚟,話佢想喺我返屋企之前見我一面。佢知道我唔會再返嚟Pency。
吖係,有樣嘢唔記得咗同你講。佢哋踢咗我出校。就算聖誕假完,我都唔會再返嚟,事關我有四科都炒晒粉,兼且我都一啲都唔比心機喎。佢哋期期都出封警告信畀我,叫我好開始努力讀書,特別係期中試。嗰陣,我老竇老母先嚟同Thurmer傾過,不過我梗係無聽佢哋講啦。所以咪拎晒F囉。喺Pencyr呢度,派F係成日都有架啦。Pency嘅學界排名好高。堅係高。
點都好啦,嗰時係十二月嚟,凍到好似入咗雪房咁,特別係山頂呢度。我淨係得件風褸,手套又無乜都無。上個禮拜,我件駝絨大褸先畀人偷鬼咗,我對皮手套仲放咗喺件裱嗰袋度呀頂。Pency呢度好多賊仔,呢度好多有錢仔,但賊仔一樣咁多。我唔係講笑,一間學校學費越貴,就有有越多賊仔。唔理別,我仲企咗喺座炮隔籬,睇緊下面場波,同埋凍到屎忽都甩。只不過,其實唔係真係咁想睇場波。我企咗喺度嘅真正原因係,我想感受清楚一樣嘢,我真係要離開呢笪地方。我意思係,我喺唔同嘅學校走過,但走嗰時,我甚至係感覺到自己真係走緊。咁樣真係乞人憎。我唔理走係好事定壞事,我淨係想自己感覺到,自己真係離開呢笪地方呢回事。如果你感覺唔到,到頭來你只會更難受。
好在,突然間我醒起啲嘢,我先肯定到,我真係離開呢笪鬼地方喇。忽然間,我記起件事,大概十月左右,我、Robert Tichener,同Paul Campell喺教務大樓前面打緊欖球。佢哋係好人嚟,特別係Tichener。嗰時係夜晚食飯之前,越嚟越黑,但我哋照打緊波。黑得越嚟越交關,連粒波都就快睇唔到,但我哋就係唔想停。但最尾,都係要停。生物阿 SIR Zambesi,喺教務大樓度仲伸個頭出嚟,叫我哋返入宿舍準備開飯。如果我可以記得起呢啲事,咁我就可以好好哋感覺到自己要離開呢笪地方,當我想嗰陣,起碼,大部份時間我都做到。我一感覺到,就即刻轉身跑落山嘅另一邊,即喺old spencer嗰邊。佢唔係住喺學校範圍裡面,佢住喺 Anthon Wayne大道。
我即刻跑去主閘度,然後我等咗一秒去抖返順條氣。我無乜氣跑步,如果你想點解嘅話。一來,我食煙食得好勁,係嗰時食得勁。佢哋迫我戒咗佢。二來,喺舊年,我一高高咗六寸半。亦都係因為咁,搞到我有肺癆,要嚟呢度檢查呢樣檢查嗰樣。我而家好健康㗎喇,不過。
是鬼但啦,當我一抖返順條氣,我就跑過204路。條路結晒冰,我差啲仆街呀頂。我其實唔知我要做乜鬼嘢要跑--我估我嗰下中意跑掛。一跑過咗條路,我嗰時覺得我好似消失緊咁。嗰個係一個痴孖筋嘅下晝,凍到甩肺,一啲陽光都無,而你每次過咗一條馬路,你都覺得自己消失緊。
話你知,我跑到老Spencr屋企前面,就有咁快得咁快㩒佢門鐘。我嗰時真係凍到結冰。我對耳開始痛緊,而我啲手指直情係差啲郁唔到。「過嚟呀,過嚟呀」我大叫咗出嚟,幾乎,「揾人嚟開門呀!」終於Spencer太都過嚟開門。佢哋一個工人都無,佢哋永遠都係自己過嚟開門。佢哋無太多嘅錢。
「Holden!」Spencer太話,「見到你就好喇!入嚟啦!哎呀,你一定凍到死喇!」我諗佢都幾開心見到我嘅。佢中意我。至少,我覺得係咁。
話你知,你真係估唔到我入屋入得幾快。「Spencer太你幾好吖嘛?」我話。「Specner生佢點呀?」
「Holden,畀件褸我幫你掛起佢吖」佢話。佢聽唔到我問佢Spencer點樣。佢有少少撞聾。
佢掛起咗我件褸喺衣櫃度,我就係用梳返啲頭髮去後面。我而家留緊嗰陸軍裝,從來都唔洗點梳頭。「Spencer太,你近排幾好吖嘛?」我再問多次,不過再大聲咗啲,等佢聽得到我講乜。
「Holden,都係咁啦,過得去嘅。」佢閂返埋衣櫃度門,「你呢?」聽到佢咁問,我就知Spencer生講咗佢聽,我已經畀人踢咗出校。
「唔錯咁啦,」我話。「Spencer生點樣,佢感冒好返未?」
「好返晒啦!Holden,佢生猛到好似⋯⋯我都唔係咩喇⋯⋯佢喺佢間房呀Holden。你入去啦。」
edit
No comments:
Post a Comment