麥田捕手 第三章 廣東話初繹稿
Saturday 30 December 2017
我會係,你成世人入邊見過,最大話嘅人。真係好大獲。我就算只係去緊間鋪頭買本雜誌,如果有人問我去緊邊嘅,我隨時係會答佢我去緊睇歌劇。大鑊呢?所以我話畀Spencer聽,我要去健身室拎返我啲架生,完完全全係大話嚟。我根本就無擺過架生喺健身室。
當我仲住喺Pencey嗰陣,我住喺新宿舍嘅奧辛堡紀念堂。嗰堂淨係俾三四年級學生。我嗰時係三年級生。我同房係四年級。嗰堂就係跟個叫以前Pency呢度嘅學生奧辛堡命名。佢離開咗Pencey 之後就靠做殯儀生意賺咗好多桶金。佢做嘅係,佢喺全國周圍都開晒殯儀館,而如果你有屋企人死咗,你只喺要用五蚊美金就可以葬咗佢。你真係應該要見下奧辛堡。佢九成九只係只會用剷堆起啲屍,再一嘢倒晒落河。總之呢,佢就俾咗堆錢Pencey,跟手佢哋就用咗佢嗰名嚟叫個堂喇。今年第一場欖球賽嗰時,佢揸住間佢架爛鬼大 Cadillac走咗嚟學校,我哋個個都要喺看臺度對住佢歡呼打氣。跟住,喺第朝,要喺聖堂,焅住聽佢演講,聽成十個鐘左左右啦頂。佢一開始就會講成五十個爛gag,只係為咗表演到佢都係正常男人咁。真係不得了。跟住佢就開始同我哋講,當佢遇到麻煩嘢,佢就會即刻跪低向上帝祈禱嗰陣
佢係有幾從來都唔覺得羞恥。佢同我哋講,無論喺邊度,我哋都應該幾時都向上帝祈禱,同阿神講嘢點點點。佢同我哋講,我哋應該當耶穌係我哋老友乜乜乜。佢話佢成日都同耶穌講嘢。就算佢係揸緊車都好。我真係想死呀。我完全想像到呢條扮晒蟹嘅蛋散一邊入緊1波,一邊叫耶穌俾多五條屍佢葬。佢演講唯一好嘅部份就係中間嗰時。佢喺度話緊俾我哋聽佢係個有幾好嘅人,有幾咁之不得了,突然之間,坐喺我前一行呢個人,Edgar Marsalla,放咗好堅嘅屁。呢件事係好惡頂,喺聖堂同呢個環境,但同時呢件事又係幾鬼正。死鬼Marsalla,佢大聲到可以拆咗嗰天花板落嚟.。幾乎無人有膽笑出聲,阿奧辛堡就扮到佢好似直情聽唔到咁。但阿Thurmer,我哋嗰校長,就喺主席台上面坐喺佢隔籬,你一睇就知校長完全聽到晒。唉,佢佢真係好難頂架。佢嗰時一句聲都無出,但第晚就要晒我哋去教學大樓嗰study hall,然後就上嚟講一大輪嘢。佢話喺聖堂製造咁樣嘅騷擾出嚟嘅人唔適合喺Pencey呢度讀書。喺Thurmer講緊嗰陣,我哋試過想要Marsalla再嚟整多獲,但係佢實在唔喺狀態喇。總之,呢度就係我喺Pencey住嘅地方。新宿舍嘅奧辛堡紀念堂。
喺Spencer 生度走咗,返到去我間房感覺真係幾好,因為所有人都落晒去睇波,喺我哋間房嘅暖爐又終於有返次係著嘅。其實都幾舒服。我除低我件褸同呔,解埋裇衫件頸喉鈕,再戴起呢頂嗰朝喺紐約買嘅帽。就係呢頂紅色獵帽,嗰帽耳同帽舌都好長好長。我哋行出地鐵嗰陣,我就係間運動用品鋪嘅櫥窗見到佢,就係喺我唔見晒所有啲花劍之後。佢只係用一蚊就買得到。我會調轉戴帽嚟戴,帽舌喺後面,咁戴法係好扮嘢,我認,但我就係中意咁戴。我咁戴好睇吖嘛。跟住我拎起呢本我睇緊嘅書,坐低咗喺櫈度。呢度每間房都有兩張櫈。我有一張我嘅,我同房,Ward Stradlater都有佢嘅。嗰扶手嗰形狀好可憐,因為每個人永遠都係坐喺扶手度,但呢兩張始終都係好舒服嘅櫈。
我睇緊嘅呢本書係我唔小心喺圖書館拎咗出嚟。佢哋俾咗本錯嘅書我,我又一路都無為意直至我返咗我間房。佢哋俾伊薩克.狄尼森寫嘅《遠離非洲》我。我以為呢本書應該會好劣下,但結果無。呢本係非常好嘅書。雖然我幾乎係文盲,但我睇好多書。我最愛嘅作者嘅我阿哥D.B,而我第二最愛嘅係Ring Lardner。我阿哥送咗本Ring Lardner嘅書俾我做生日禮物,就喺我嚟Pencey讀書之前。本書有啲好搞笑好癲嘅故故仔,有個故仔係關於嗰交通警,而怇中意嗰好可愛嘅女仔,而嗰女仔成日都超速。只係,佢結咗婚,嗰差佬,所以佢無得同嗰女仔結婚又或者點。然後嗰女仔死咗,因為佢成日都超速。嗰故仔就係咁正。我最中意呢本書喞係,佢起碼間中就會搞下笑。我睇好多經典,例如係《The Return of the Native》嗰啲,同睇好多戰爭書同神話嗰啲,但佢哋唔會咁迷到我。最迷到我嘅係,一本書...當你讀完晒佢,你會希望嗰作者係你好好嘅朋友,而只要你想你可以隨時打俾佢。咁嘅感覺好少會發生。我唔會介意打俾呢個伊薩克.狄尼森。同Ring Lardner,不過D.B.話我知佢已經死咗。你可以睇下嗰本Of Human Bondage,Somerset Maugham 寫嘅。我舊年夏天睇嘅。係本幾好嘅書,但我唔會想打俾Somerset Maugham。我唔知呀。佢只係唔係我會想俾佢嗰種人。我寧願打俾Thomas Hardy。我中意嗰個Eustacia Vye。
總之,我就戴起我頂新帽,坐低咗開始睇《Out of Africa》呢本書。我已經睇晒佢架喇,但我重新睇多次某啲位。不過,當我聽到有人走浴簾嗰時,我只係睇咗三頁左右。就算無抬起頭望,我都知係邊個。係Robert Ackley,住我隔籬房嗰個人。喺新宿舍呢度,每兩間房中間就有間浴室,而每日大約85次阿Ackley都會撞入嚟我呢邊。佢應該係除咗我,全個宿舍唯一一個無去睇波嘅人。佢幾乎邊度都唔會去。佢係個好古怪嘅人。佢係四年級生,而四年嚟佢都係喺Pencey呢度讀,但每個人都只會叫佢全名。就算Herb Gale,佢同房都唔會佢叫做BOB就或者甚至只係Ack。如果佢會結婚,佢老婆分分鐘都只會嗌佢做Ackley。佢係嗰啲好高好高駝背嘅男仔 — 成6尺四高,仲有排爛牙。佢住喺我隔籬房咁耐以嚟,我未試過一次見到佢刷牙。佢啲牙幾時都係望落發晒霉咁好嘔心,佢真係幾乎就可以令你嘔出嚟,只要你喺飯堂見過佢,而佢嗰口塞滿晒薯蓉同青豆同唔知乜嘢。唔只呀,佢仲有好多暗瘡。唔係喺佢額頭或者係面額,好似其他男仔咁,而係成塊面都係呀!而且唔只咁樣,佢份人仲要好難頂。佢基本係條粉皮。我唔係太喜歡佢,講個事實你知就係。我感覺佢企喺浴室嗰門壆度,喺正我張櫈後面,望緊Stradlater 喺唔喺度。佢憎Stradlate憎到死,從來都唔會入嚟我間房如果Stradlater喺度。佢所有人都憎到死,幾乎。「Hi」佢話。佢永遠嗰語氣都係會係好似佢悶到死或者攰到死。佢唔想你會覺得你覺得佢特登過嚟揾佢。佢想你覺佢係唔小心走咗入嚟呀,頂。
「Hi」我應,但我視線無離開本書。對於好似Ackley咁嘅人,如果你抬起頭望佢,你就無架喇。你點都無架喇其實,但如果你唔抬起頭就唔會無得咁快。佢開始喺間房行嚟行去,慢慢慢咁行,就好似佢平時,喺你枱面同書櫃拎起你啲私人嘢嚟睇。佢成日都係咁拎起你啲私人嘢嚟睇。唉,佢有時真係會激到你躁。「場劍擊比賽點呀?」佢問。佢只係唔想我繼續睇書同享受自己嘅時間咋。佢對場劍擊根本一啲興趣都無。「我哋贏咗定點?」佢問。
「無人贏」我答。無抬起頭,不過。
「咩呀?」佢話。佢成日都要你所有嘢都講兩次。
「無人贏呀」我答。我裝咗下佢喺我書櫃嗰邊搞緊乜鬼嘢。佢喺睇緊嗰張相,係呢個我喺紐約成日一齊出街嘅女仔,Sally Hayes。佢一定係拎起咗張死人相嚟睇咗成五千次有多,自從我有咗呢張相之後。同埋,佢永遠都會放返張相喺錯嘅位,佢望完之後。佢係特登咁做。你睇得出架。
「無人贏.....」佢話。「點解呀?」
「我留低晒啲花劍同其他嘢喺地鐵嗰度」我都係無抬頭望佢。
「喺地鐵嗰度,唔係呀嘛!你整唔見咗佢哋,你意思係?」
「我哋搭咗上架錯嘅地鐵。我要喺起身去望幅牆嗰爛鬼地圖呀。」
佢行咗過嚟,擋正喺燈前面。「喂,」我話。「我同一句睇咗成廿次喇,你過咗嚟之後。」
所有人聽到都應該會醒水,除咗Ackley。佢唔會,梗係。「佢哋會唔會要你俾錢賠返啲嘢?」佢問。
「我唔知,亦都唔鬼想理。不如你坐低又或者點都好啦,Ackley仔?你擋住晒啲燈呀。」佢唔中意你嗌佢做「Ackley仔」。佢永遠都會同我講我先係Holden仔,因為我十六歲而佢十八歲。次次都會激到佢癲當我叫佢做「Ackley仔」。
佢繼續企咗喺度。佢就係當你叫佢行開唔好擋住啲燈,佢就死都唔行開嗰啲人。佢會嘅,最後,但會用多好多時間囉如果係你叫佢做嘅話。「你睇緊乜鬼嘢呀?」佢問
「書囉。」
佢揾手大力抆我本書去睇嗰書名係咩。「好睇嘅?」佢問。
「我睇緊嘅呢句真係好精彩。」我可以好賤嘴如果我想嘅話。佢唔明我意思,但係。佢又再喺房度行嚟行去,郁我啲私人嘢,同埋Stradlater啲嘢。最後,我將我本書放喺地下。你乜都讀唔到入腦,當有Ackley咁嘅人喺度。無可能得。
我喺張櫈度挨低晒,睇住Ackley當呢度係自己屋企。我有啲攰喇去完紐約,我開始打喊露。之後我開始搞呢搞路。有時我會係咁搞呢搞路,只係為咗費時悶親。我做嘅係,我將我頂獵帽嘅帽舌拉返去前面,再拉低搇住我對眼。搇到,我乜鬼嘢都唔會睇到。「我好似就快盲喇。」我扮晒嘢咁講。
「媽咪,所有嘢都變到好黑呀呢度。」
「你都痴鬼線嘅!」Ackley話。
「媽咪,俾你隻手我吖,點解你唔肯伸隻手俾我?」
「痴線,大個啦你」
我開始伸開手周圍摸,好似嗰盲人咁,但無企起身或者點樣。我不停講,「媽呀,點解你唔肯伸隻手俾我?」我只係扮緊嘢,好明顯。做呢啲嘢有時我會好爽。而且,我知咁樣可以煩到Ackley到傻。佢永遠都逼到我最賤嗰面出嚟。我對住佢就成日忍唔住要賤。不過咁,我最後,都係停咗。我將嗰帽舌帶返去後面攤抖。
「邊個㗎呢嚿嘢?」Ackley問?佢拎我同房嗰護膝俾我睇。Ackley呢條友咩都會拎起。佢連你條底横都會拎起。我話佢知係Stradlater嘅。所以佢掟咗嗰護膝去Stradlater張床度。佢係喺Stradlater嘅書櫃拎起嘅,所以佢會掟咗去床度。
佢行咗過嚟坐低咗喺Stradlater張櫈嗰扶手度。佢從來都唔會坐落張櫈度。永遠坐扶手。「你喺邊鬼度買頂帽?」佢話。
「紐約。」
「幾錢呀?」
「一蚊。」
「你畀人劏咗啦。」佢開始喺用火柴尾嚟清佢啲爛鬼指甲。佢幾時都喺度清緊佢啲指甲。係有啲搞笑嘅,某方面嚟講。佢啲牙幾時都係發咗霉,同佢耳仔幾時都係咁鬼污糟,但佢偏偏無時無刻都清緊佢啲指甲。我估佢覺得咁做會令佢變到係嗰好乾淨嘅人。佢清緊佢啲指甲嗰陣再望多眼我頂帽。「喺我屋企嗰邊,我哋係戴呢啲帽去殺鹿架,頂。」佢話。「係頂殺鹿帽嚟。」
「一定係咁啦。」我除咗頂帽落嚟望。我眯埋咗隻,好似瞄準緊咁。「呢頂係殺人帽。」我話。「我射人嗰時就戴住呢頂帽。」
「你屋企人知道你被人踢出校未?」
「未。」
「係喎,Stradlater喺邊鬼度?」
「落咗去睇波。佢有女陪呀。」我打咗嗰喊露。我打咗成晚喊露。其一原因係,間房太鬼熱。會搞到你好眼瞓。喺Pencey,你一係就凍到死,一係就熱到死。
「好嘢呀Stradlater」Ackley話。「喂,借你把較剪俾我一陣吖,得唔得呀?你有無喺手?」
「無呀。我放咗落行李度。放到好深喺衣櫃度。」
「拎出嚟一陣囉?得唔得呀?」Ackley問。「我有條倒刺想剪咗去呀。」
佢唔會理你係放咗啲嘢喺行李,又或者放到喺衣櫃櫃頂咁高。不過,我都係拎咗俾佢。同埋,我差啲死咁樣做。我一打開衣櫃嗰一秒,Stradlater嗰網球拍,木造㗎,就跌咗落我嗰頭度。澎一聲勁大聲,同埋痛到仆街囉。不過,都幾乎就殺埋Ackley。佢開始笑到男高音咁。我拎緊我嗰行李落嚟同拎把較剪嗰陣,佢就一路係咁笑。呢啲嘢,即係有人畀嚿石或者其他嘢打到嗰頭,就會引到Ackley停唔到笑。「你真係好鬼有幽默感呀Ackley仔。」我話佢知。「你知唔知呀?」我遞把較剪俾佢。「俾我做你經理人。我會帶你去上電台。」我坐返落我張櫈度,而佢就開始剪佢啲又大又尖嘅指甲。「不如你喺枱度剪定點啦」我話。「喺張枱度剪呀!得唔得?我唔係好想我對腳要咁行喺你啲剪甲碎上面呀今晚。」佢繼續喺度剪指甲落地下,不過。咁樣真係好仆街嘅行為,我認真架。
「Stradlater係約咗邊個女仔?」佢問。佢成日都係度八Stradlater溝緊邊個,就算佢憎Stradlater憎到仆街。
「我唔知喎。做咩呀?」
「無咩喎。我頂唔順呢條粉人啫。佢就係條粉人我真係頂唔順嘅。」
「佢好中意你喎。佢話我知佢覺得你簡直係個王子。」我話。我成日都叫人做王子當我玩嘢嗰陣。咁樣可以令我無咁覺得悶。」
「佢嗰態度成日都覺得自己高高在上咁。」Ackley話。「我就係頂唔順嗰條粉人。你會以為佢......」
「喂,你可唔可以喺枱面剪指甲呀?」我問。「我叫咗你成五十......」
「佢嗰死人態度成日都覺得自己高高在上咁。」Ackley話。「我直情唔覺佢有咩智慧。但佢覺得佢好醒。佢覺得佢係全世界......」
「Ackley! 我頂!你可唔可以喺枱面剪你啲爛指甲呀?我叫咗你成五十次喇!」佢終於喺枱面剪佢啲指甲。唯一要佢做任何嘢嘅方法就係喝佢去做。
我望佢咗一陣。然後我話,「你唔中意 Stradlater 嘅原因根本係佢時不時叫你刷牙。佢咁講出嚟,唔係為咗要悔辱你呀。佢語氣唔係最好,但佢唔係想講任何悔辱你嘅說話呀。佢意思只係你會睇落好啲感覺好啲,如果你得閒刷下你棚牙嘅話。 」
「我有刷牙。你唔使咁同我講。」
「無,你無。我睇住你架,你係無刷。」我話。我無話咁樣係有幾嘔心,不過。我覺得有小小對佢唔好意思。我意思係,咁講,好自然地,唔係太友善,如果有人話你你無刷牙。
「Stradlater係無乜嘢架。佢唔係咁衰。」我話。「你唔明佢啫,呢個先係問題。」
「我一樣會話佢係條粉人。佢就係個串柒柒嘅粉人。」
「佢係串嘅,但佢有啲位係好大方。佢真係架。」我話。「嗱。當啦下,假設Stradlater戴咗條呔或者係其他嘢,而你中意嘅。係就當佢打條你好鬼中意嘅呔,我舉嗰例啫而家。你知唔知佢會點做?佢好可能會除咗落嚟送俾你。佢真係會。又或者,你估佢會點做?佢會放喺你張床度或者其他地方。總之佢會俾鬼咗條呔你。大部份人可能只會......」
「挑!」Ackley話。「如果我係佢咁有錢,我都會。」
「唔會,你唔會。」我擰擰頭。「唔會,你唔會呀,Ackley仔。如果你係佢咁有錢,你會係係其中一個最......」
「唔好再叫我Ackley仔。我頂。我大到可以做你爛鬼老竇呀。」
「錯,你唔得。」唉,佢有時真係好識誇大。佢唔會錯過每一個機會去話你知,你係十六歲而佢係十八歲。「首先,我唔會俾你成為我屋企一份子。」
「嗱,總之咪再叫我......」
突然之間,度門開咗, Stradlater 撞咗入嚟,急急腳咁。佢幾時都係咁急急腳。所有嘢都好緊要咁。佢走咗過嚟我度,玩住咁啪咗兩下我塊面嘅兩邊─咁樣做有時真係好煩。「聽住,」佢話。「你今晚有無邊度要去?」
「我唔知喎。有掛。出邊而家點?落雪?」佢成件褸都有雪喺面。
「係呀。聽住,如果你今晚無地方要去。不如借你件千鳥格褸俾我?」
「邊個贏咗場波?」我問。
「而家半場咋。我哋走先咋。」Stradlater話。「唔係講笑,你今晚會唔會着你件千鳥格褸?我倒瀉咗嘢喺我件灰色絨褸呀。」
「唔著呀,但我唔想畀你嗰死人膊頭撐大咗件衫喎喂。」我話。我哋係一模一樣高,但佢係兩個我咁重。佢嗰膊頭係嗰啲橫到不得了嗰種。
「我唔會撐大咗佢。」佢急急腳行咗去衣櫃。「喂點呀你?Ackley」佢同Ackley講。Stradlater.佢起碼係個幾友善嘅人。呢種友善係有啲假嘅,但至少佢會同Ackley打招呼吖。
Ackley忟忟地當佢話「喂點呀你?」佢唔想答佢,但佢唔夠膽又或者唔夠嬲去唔答。佢同我講,「我諗我要行先喇,遲啲見。」「好呀。」我答。佢行返去佢自己間房嗰陣佢從來唔會真係令你覺得可惜。
Stradlater 開始除佢啲褸呀呔呀盛。「我好似應該要快手剃個鬚。」佢話。佢啲鬚真係好濃好大把。佢真係架。
「你約咗嗰個女仔而家喺邊呀?」我問佢。
「佢喺新翼等緊。」佢就咁挾住佢啲梳洗用品同大毛巾行出房。一件衫都無著。佢成日都係咁樣光脫脫走嚟走去,事關佢覺得自己好大隻。佢係嘅,的確。我無得唔認。
edit
No comments:
Post a Comment