麥田捕手 第四章 廣東話初繹稿
Sunday 20 May 2018
我無乜特別嘢搞,所以就落咗淋浴間,同佢吹下水,佢就一邊喺度剃緊鬚。我哋係淋浴間僅有嘅兩個人,事關其他人仲睇緊波。呢晚熱到痴咗線,啲窗都熱到有晒水氣。嗰度牆前面有大概十個洗手盆。Stradlater用緊中間嗰間,我就喺佢右手邊嗰個前面坐低咗,喺度開下閂下啲凍水- 我一緊張就會咁做。佢一路剃鬚,一路喺度吹口哨,Song of Indaia。佢吹親口哨都好鬼高音,而且永遠吹唔啱音, 但佢偏偏永遠揀啲好難嘅歌嚟吹,講緊係即使你擅長吹口哨都好難,好似係Song of India 又或者係Slaugther on Tenth Avenue。佢真係可以搞爛首歌㗎。
你記得㗎啦,我之前話過阿Ackley啲個人習慣好唔得。喇,Stradlater 都係咁,不過係污糟喺另一啲位。Stradlater嘅污糟係收得好埋。Straflater佢...睇落去永遠都正正常常,但,舉個例,你望佢用嚟剃鬚嗰鬚刨就知。一直以來,佢已經係生鬼晒銹,永遠都痴住啲番梘泡同佢啲毛。佢從來都無話要洗吓佢。佢永遠睇落去都好好㗎,只要係佢肯好好搞掂自己,但佢暗啞地始於都係個喇踢佬,只要你好似我咁熟佢你就明。佢之所以肯整乾淨自己睇落去好地地,只係佢根本就極度自戀。佢覺得自己係Western Hemisphere入面最靚仔嘅一個。咁佢的確係幾靚仔嘅,我承認。但佢嗰種靚仔,就只係嗰種你老竇老母睇你本畢業冊嗰時會忍唔住問「呢個邊個嚟?」嘅程度。我意思係佢最多就係畢業冊入面嗰種靚仔。喺Pency入面我識好多個人我都覺得佢會靚仔過Stradlater,但佢哋喺畢業冊上面望落去唔會靚仔。佢哋睇落去會好似有個大鼻或者有對兜風耳咁樣樣。呢種經驗,我成日都有。
是但啦,我坐咗喺洗手盆前面,喺正Stradlater隔籬,而佢剃緊鬚,我就喺度開下閂下水喉。我仲戴緊我頂紅色獵帽,嗰帽舌翻咗後面。我真係好中意頂帽。
「喂!」Stradlater話。「幫我個忙吖?」
「咩料呀?」我答。無佢咁好氣。佢永遠都會叫你幫佢個忙。每個好靚仔嘅人,又或者每個覺得自己好大支嘢嘅人,佢哋永遠都會叫你幫佢個忙。因為佢哋中意自己到痴咗線,佢哋會以為你都係咁中意佢,所以你都好想好想幫佢哋 。其實係有啲搞笑嘅,某程度上。
「你今晚會唔會出去?」佢話。
「可能出,可能唔出,未知。做乜呀?」
「星期一堂歷史我仲有成一百頁要讀。」佢話。「不如幫我英文作篇文啦,星期一我交唔到份爛鬼嘢我就懶硬嘢,所以我問你幫手咋。點啫?」
好諷刺成件事。講真。
「我科科都肥晒,你仲叫我幫你作篇爛鬼文?。」我話
「我知,問題係,我交唔到文就會死梗。幫幫手啦老友,兄弟嚟㗎嘛!得唔得呀?」
我無即刻答佢。停學好呀,最啱啲好似Stradlater呢啲粉人。
「寫咩呀?」我問。
「咩都得。咩都得只要係描寫文。一間房。又或者一間屋。又或者是但一個地方你曾經住過,又或者咩都好啦 --你明啦,總之越描寫越詳細越好啦。」佢講緊嗰時打咗個大喊露,真係好乞人憎。你諗下,有人叫緊你幫手嗰時係度打喊露呀。「唔使寫得太好㗎,同埋。」佢話。「死人Hartzell覺得你英文好掂,佢又知你係我同房。所以我意思,你啲標點呀乜乜乜呀唔好全部都啱㗎。」
呢樣又係好鬼乞我憎。我意思如果你寫文好,然後有人喺度開始同你講標點。Stradlater成日都係咁做。佢想你覺得佢寫文差嘅唯一原因係佢將啲標點放錯晒位。呢啲,佢有啲似Ackley。我試過藍球賽嗰時坐喺Ackley隔籬,我哋隊有個勁人,Howie Coyle,佢可以喺中場就射入打沉晒其他人,連藍板都未使掂呀。Ackley不停講,係成場波不停講,Coyle係因為嗰身型啱晒打藍球。頂,我真係好憎咁。
我坐坐吓開始見悶,所以我退後咗幾步開始喺度跳踢踏舞,純粹係好想跳。我只係喺度同自己玩。我唔係真係識跳踢踏舞啦,喺淋浴間有石地板嘛,啱晒跳踢踏嘛。我開始喺度扮睇戲見過嗰啲人。其中一套嗰啲音樂劇。其實我憎睇戲憎到不得了,但我硬係中意扮啲演員。Stradlater剃緊鬚嗰陣喺鏡反射度望住我。我需要嘅只係個觀眾。我中意演嘢。「我係市長嗰仔。」我話。我好投入。周圍喺度跳踢踏舞。「佢唔想我做踢踏舞舞者。佢想我去牛津讀書。但跳踢踏舞呢件事已經入咗我骨。」Stradlater笑咗。佢啲幽默感唔算太差。「嗰晚係齊格菲歌舞團嘅開幕夜。」我開始無咩氣。我幾乎一啲耐力都無。「嗰男主角跳唔到。佢醉到成條粉皮咁。咁佢哋可以揾咁 邊個頂佢個位。我,嗰個人就係我。爛鬼市長嗰仔呀。」
「你喺邊度買㗎頂帽?」Stradlater問。佢指我頂獵帽 。佢之前未見過。
反正我都真係無晒氣,所以我停咗無再玩。我除咗頂帽落嚟,睇咗佢差唔多19次。「我今朝喺紐約買。一蚊美金 。你中意頂帽?」
Stradlater點點頭。「正呀!」佢話。不過,佢只係喺哄緊我,事關佢即刻就話:「聽住呀喂,你係咪會幫我寫篇文㗎?我要知答案呀。 」
「如果我有時間,我會。如果我無,我唔會。」我話。我行過去又再坐低咗喺佢隔籬。「你約咗邊個呀?」我問佢。「Fitzgerald ? 」「痴線,點會?我話你知,我同條八婆玩完㗎喇。」
「真係㗎?讓咗佢俾我啦喂。唔係講笑,佢係我中意嗰種女仔。
「佢....佢太大個喇對你嚟講。」突然之間,完全無理由,真係,除咗我本身係喺玩嘢嘅狀態,我好想跳入佢嗰格,一嘢半尼爾森式衝過去。係招摔角鎖技嚟,假如你唔知係咩嚟嘅話,即係你鎖住對方條頸,整到佢窒息到死為止,如果你想嘅話。所以我就咁樣做咗。我成隻死人豹咁跳上佢嗰身度。
「頂,Holden,你停手喇下!」Stradlater話。佢唔多想話 玩。佢剃緊鬚又剩咁。「你想我點呀?剃咗嗰頭落嚟係咪?」
我無放手,不過。我嗰半尼爾森式鎖得佢緊。「俾啲掙扎,自己解開我嘅鎖技啦。」我話。
「頂你個肺!」佢放低把剃刀,突然之間就手臂用力撞上嚟,破咗我嗰鎖技。佢份人好大力。而我份人好弱雞 。「而家,你唔好再玩嘢。」佢話。佢又開始喺度再剃多次鬚。佢永遠都會剃兩次,為咗睇落好好睇睇。用佢把又殘又老嘅剃刀。
「咁你約咗邊個女仔,如果唔係Fitzgerald?」我問佢。我又咗坐咗佢隔籬嗰格。「Phyllis Smith BB?」
「唔係。本來應該係嘅,但搞搞下嗰安排食晒屎。而家我約咗Bud Thaw條女嗰同房......吖我幾乎唔記得。佢識你㗎喎。
「邊個識我呀?」我話。
「我約嗰女仔。」
「係?」我話。「佢叫咩名呀?」我好有興趣知。
「我諗緊......呀,Jean Gallagher,」
.
頂,佢講出嚟嗰下我差啲嚇死。
「Jane Gallagher」我話。我甚至喺洗水盆度彈咗起身。我真係差啲死。「頂你啱呀我真係識佢。上上個暑假嗰時,佢真係就住喺我隔籬屋咋。佢養咗隻大杜賓犬。所以我會先識到佢。佢隻狗成日走過嚟我哋度.....」
「你擋住啲光呀頂,Holden。」Stradlater 話。「你係都要企喺嗰度嘅係咪?」
頂,不過我真係好興奮。我真心係。「佢喺邊呀? 」我問佢。「我要落去同佢打個招呼又好咩都好。佢喺邊呀?喺新翼?」
「係呀。」
「佢點樣會提起我嘅?佢而家係咪去咗B.M.度讀?佢話過佢可能會去嗰邊讀。佢都話會過可能會去Shipley。我以為佢係去咗Shipley讀。佢點樣提起我㗎?」我好興奮。我真心係。
「我唔鬼知呀頂。你企唔企身呀?你坐住咗我條毛巾。」Stradlater話。我原來坐咗喺佢爛毛巾上面。
「Jane Gallagher。」我話。我接受唔到。「頂唔鬼係呀。」
Stradlater 搽緊髮泥上佢嗰頭髮。係我嘅髮泥。
「佢跳舞㗎。」我話。「跳芭蕾。佢以前日日都會練兩個鐘舞,喺正最熱嘅天氣。佢會擔心咁樣會搞到佢對腳唔好睇 -- 會粗會剩。我以前成日同佢玩國際象棋㗎。」
「你以前成日同佢玩咩㗎話?」
「國際象棋。」
「國際象橫......唔乸係呀!」
「係呀。佢唔會郁佢任何一隻王。佢會做嘅係,當佢得咗一隻王,佢就唔會再郁佢。佢會就就咁由隻棋留喺最後一排。佢會將十八隻棋都放晒喺最後排。然後就唔會再用佢哋。佢就係中意咁樣,見到佢哋每一隻都留晒喺最後排嘅樣子。」
Stradlater咩都無講。呢種事對大部份人嚟講都係無乜趣。
「佢媽媽同我哋去埋同一個俱樂部。」我話。「我以前會去做下球,賺返幾蚊使下咁。我幫佢媽媽做過幾次球僮。佢大概每次會打170桿度,9 個洞。」
Stradlater 幾乎係完全無聽緊。佢梳緊佢啲靚靚嘅打結嘅頭髮。
「我應該要落去,同至少要同佢打個招呼。」我話。
「咁你做咩唔落?」
「我會落,過多陣。」
佢又再喺度係度梳佢個分界。佢要成個鐘嚟梳頭。
「佢媽媽同爸爸離咗婚。佢媽媽再嫁咗俾個酒鬼。」我話。「佢瘦猛猛對腳鬼咁多毛。我記得佢呀。佢幾時都係著短褲。Jane話佢應該係做話劇又或者乜鬼嘢啦,但我見過佢做嘅事就係幾時都喺度飲酒,同埋聽緊電台嘅靈異節目。同埋圍住間屋跑步,無著衫,Jane都喺度,都係咁跑。」
「係?」Stradlater話。佢對呢件事好有興趣。酒鬼無著衫圍住間屋跑來跑去,而Jane係喺度。Stradlater呢條粉皮真係好咸濕。
「佢童年真係好差。我唔係講笑。」
咁對Stradlater就無興趣喇。只有咸嘢成份嘅事先引到佢有興趣。
「Jane Gallagher。頂真係。」 我嗰腦無法子唔諗起佢。我真係唔得。「我要落去同佢打招呼,最少最少都要。」
「咁你做乜鬼唔落去呀?淨係喺度係咁講。」Stradlater話。
我行過去窗度,但喺窗度你咩都唔會望到,嗰窗因為淋浴室啲熱力全部都佈滿晒水蒸氣。
「我而家未有嗰個心情。」我話。亦都真係未有心情。你要嗰心情啱先可以做呢啲事。
「我以為佢去咗Shipley講。我幾乎可以發誓佢去咗Shipley。」 我喺淋浴間行嚟行去行咗陣。我無其他嘢可以做。「佢中唔中意場波?」我話。
「係掛,我估。我唔知喎。」
「佢有無話你知我哋以前成日一齊捉棋,又或者咩呀?」
「我唔知呀頂,我啱啱先識佢咋。」Stradlater話。佢終於梳佢嗰爛鬼靚頭。佢收好緊佢啲起晒泡嘅梳洗用品。
「聽住。幫我同佢打個招呼,得嘛?」
「得啦。」Stradlater話,但我知佢應該都唔會。好似Stradlater呢種人,佢哋永遠都唔會幫你同人招聲招呼。」
佢返咗房,但我喺淋浴間留咗陣,諗住Jane。然後我都返咗房。
Stradlater打緊呔,喺鏡前面,當我返咗去嗰陣。佢半世人嘅時間都係花咗喺鏡前面。我坐咗喺我張橩度,望住佢望咗陣。
「喂!」我講。「唔好話佢知我畀人踢咗出校,得唔得?
「得啦。」
呢個係Stradlater嘅好處。你唔使樣樣小事都同佢解釋,好似對住Ackley咁。好大原因,我估,係因為佢根本無乜興趣。真係因為咁㗎。Ackley,就唔同。Ackley係個好八掛嘅粉皮。
佢著起我件千鳥格紋褸。
「喂頂,你試下唔好撐到佢where 晒好無呀。」我講。「我著咗佢兩次咋。」
「我唔會囉。我包煙喺邊鬼度呀?」
「喺枱面呀。」佢從來都唔知自己啲嘢放咗去邊。「係你條頸巾下面。」佢將啲煙放入佢䄛袋- 我嘅䄛袋。
我將我頂獵帽嗰帽舌拉去前面,突然之間,想轉一轉。我有啲緊張,突然之間。我好易就會緊張。「聽住,你同佢會去邊度約會呀。?」我問佢。「你知未?」
「我唔知呀。紐約掛,如果有時間。佢簽咗簿話九點半就要返去喇頂。」
我唔中意佢講嘅語氣,所以我應佢: 「佢咁做嘅原因係,佢應該唔知你係嗰幾靚仔幾有魅力嘅人咋。如果佢一早知,佢應該會簽簿話聽朝九點半先返呀。」
「一定係啦。」Stradlater答。你好難先串到佢。佢太過自大。「咪講笑喇。幫我寫咗篇文佢。」佢話。佢著起佢件䄛,同埋準備好晒出去 。「唔候咁用力寫,只要描寫得有咁詳細得咁詳細就得。得無?」
我無答佢。我唔想答佢。我只係話:「問下佢,佢係咪仲放晒啲王棋喺最後一排。」
「好。」Stradlater答,但我知佢唔會做。「簡簡單單就得㗎喇。」佢啪一聲就出咗間房。
我坐咗喺度半個鐘左右佢走咗之後。我意思係就咁坐咗喺我張椅,咩都無做。我係咁諗住Jane,同埋Stradlater同佢約會呢件事。搞到我好緊張我差啲癲。我話咗你知Stradlater呢條粉皮有幾咸濕㗎啦。
忽然之間,Ackley又走鬼咗入嚟,穿過嗰浴廉,好似平時咁。係我愚蠢嘅人生入面,終於有一次,我見到佢係真係開心㗎。有佢喺度,我可以唔再諗其他事。
佢留咗喺度直到晚飯時間,喺度講其他Pency嘅人,佢又有幾憎佢哋 ,仲喺度擠佢下巴粒大暗瘡。佢連手巾都無用呀。我唔覺得條友有自己嘅手巾,講真嗰句。總之,我從來都無見過佢用手巾。
edit
No comments:
Post a Comment